Чаекте дыйканчылык багытында колдонулган жер талашка түшүп, дан эгиндерине сугат суу берүү токтотулган. Жергиликтүү бийлик эмне дейт?

Turmush — Нарын облусунун Жумгал районунун Чаек айылында 6 га жер талашка түштү. Бул жерди бир нече жылдан бери айыл тургуну Ысманбек Сардалбеков дыйканчылык багытында иштетип келген.

Өзүнүн айтымында, 3 га жер Жаман-Талаа аймагында жайгашкан. Учурунда суу жетпеген жерди өздөштүрүп, эгин, тоют чөп айдап келген. Азыркы тапта анын 80 чарчы метр жерине небереси буудай айдап, калганына өзү чөп өстүрүп жатат.

Бирок прокуратура ушул Жаман-Талаа аймагындагы 3 га жерин жайыт деп аныктаган. Ал эми айыл өкмөт мурунку айыл өкмөт башчысы берген чечимди жокко чыгарып, жерди жайытка кайтарган.

Учурда Ысманбек Сардалбековдун Көл-Арык аймагындагы 3 га жери боюнча сот иштери жүрүп жатат. «Жоон» суу пайдалануучулар бирикмеси бул жер дагы жайытка тиешелүү деп сотко беришкен. Бул иш Нарын облустук сотуна чейин жеткен.

Ысманбек Сардалбеков Turmush басылмасынын аймактык кабарчысына жерлер жайыт жерге кирет дегенден бери сугат суу берилбей, айдаган буудайы, чөбү куурап жатканын айтты. Ал суу маселеси боюнча айыл өкмөт, акимчилик, президенттин облустагы өкүлчүлүгү, УКМК жана президентке чейин арызданган.

Бул боюнча Чаек айыл өкмөтүнүн башчысы Майрамбек Асанбаев, «Жоон» суу пайдалануучулар бирикмесинин төрагасы Эсенгул Карагулов Сардалбековдун чөбү менен эгинине суу үзгүлтүксүз берилерин билдиришти.