Turmush — Нарын облусунун Жумгал районуна караштуу Миң-Куш айылында өнүктүрүү жана көрктөндүрүү багытында бир катар иштер аткарылууда. Бул тууралуу айыл өкмөтүнүн башчысы Алмаз Абдылдаев билдирди.
Анын айтымында, айыл өкмөтүнүн жалпы бюджети 42 млн сомду түзөт (улуттук банктын учурдагы курсу боюнча 480 миң 538,75 АКШ доллары), анын 30 млн сому салыктардан түшөт. Бюджет салыштырмалуу аз болгонуна карабастан, жаңы долбоорлорду тартуу жана айылды өнүктүрүү боюнча иштер үзгүлтүксүз жүргүзүлүүдө.
Балдар аянтчалары:
Учурда 9 жаңы балдар аянтчасы курулуп, пайдаланууга берилди. Алардын курулушуна жергиликтүү бюджеттен 9 млн сом бөлүнгөн. Аянтчалар 16-, 17-, 20- жана 21-кварталдарга, ошондой эле Кызыл-Соок, Сары-Булун, Табылгыты жана Кызыл-Коргон айылдарына орнотулду.
Борбордук парк:
Айылдын борборундагы парк 2,6 млн сомго капиталдык оңдоодон өтүп жатат. Бул иштер Министрлер Кабинетинин стимулдоочу грантынын эсебинен каржыланууда. Айыл башчысынын айтымында, үй-жайлардын сырткы көрүнүшүн жаңыртууга жергиликтүү меценаттар жана тоо-кенчилер көмөк көрсөтүүдө. Айыл өкмөтү болсо фасаддарды иретке келтирүү үчүн керектүү шаймандарды камсыздап берет. Ар жылы жашылдандыруу иштери да жүргүзүлүп, арча жана башка дарактар отургузулат.
Маданият үйү:
Квартал №17де жайгашкан эки кабаттуу «Тынчтык» маданият үйү совет мезгилинде курулуп, көп жылдар бою каралбай келген. Эки жыл мурда стимулдоочу гранттын эсебинен анын чатыры менен терезелери алмаштырылган. Быйыл болсо облусдук өнүктүрүү фондунун эсебинен фасады жана ички бөлмөлөрү 8,5 млн сомго капиталдык оңдоодон өтүп жатат.
Билим берүү:
Жусупа Сары уулу атындагы орто мектепке жаңы жылытуу системасы орнотулду. Анын наркы 2,9 млн сомду түзүп, стимулдоочу гранттын эсебинен каржыланды. Мектеп директорунун айтымында, быйыл окуучулар жылуу класстарда билим алышат.
Башка долбоорлор:
Кызыл-Коргон айылында хоккей аянтчасы 3,6 млн сомго жакшыртылды. Райондук өнүктүрүү каражатынан 1,1 млн сом бөлүнүп, селдин алдын алуу максатында кооптуу тилкелер бекемделди.
Алмаз Абдылдаевдин айтымында, бул жетишкендиктер айыл өкмөтүнүн жамаатынын, айылдык кеңеш депутаттарынын жана жергиликтүү активисттердин биргелешкен эмгегинин жемиши болуп эсептелет.