Turmush — Нарын облусунун Жумгал районуна караштуу Көк-Ой айылынын тургуну Шейшенбек Токтоналиев «Айыл чарбасына эмгек сиңерген кызматкер» наамы менен сыйланды.
Учурунда совхоздо берилген планды ашыгы менен аткарып, Борбордук комитеттин чечими менен Ташкенттеги жогорку партиялык мектепке билим алууга жиберилген. Кийин бул мектепти ийгиликтүү аяктаган.
Токтоналиев эмгек жолун Ат-Башы жергесинде кызмат өтөөдөн баштап, айыл чарбасын көтөрүүдөгү зор салымы үчүн өкмөттөн биринчилерден болуп кызматтык унаа алган. Кийин Түгөл-Сай айылындагы «Большевик» совхозунда директор болуп көп жылдар бою эмгектенип, 2001-жылдан тартып айыл өкмөт башчысы болуп иштеп баштаган.
Токтоналиев Жумгал жергесинде алгачкылардан болуп кант кызылчасын айдап, андан мол түшүм алууга жетишкен.
«Эки жыл катары менен 60 сотый жерге кант кызылчасын айдадык. Нарын облусу боюнча кант кызылчасын айдаган жалгыз биз эле болдук. Учурунда Чүйдөгү кант заводу менен иштешип жүрдүк. Ошондогу кагаздардын баары сакталуу. Коңшу Казакстан жана башка республикадан келген кант кызылчасынын канттуулугу 10-12% экен, меники 17-18% болуп келди. Экологиялык жактан таза деп биздикин аябай макташчу.
Азыр Кант кызылчасын өстүрүп калуума аялымдын эмгеги зор. Ал мезгилде мен кант кызылчасын кантип тигишти деле билчү эмес элем», - дейт ал.
Токтоналиев байбичеси Мыскал Абдылдаева менен 50 жылдан бери бирге түтүн булатып келе жатат.
«Абышкам экөөбүз тайпалашпыз, 50 жылга жакын чогуу жашап келе жатабыз. 5 балабыз бар. Баары өз ордун таап, үй-бүлөсү менен жашап жатышат. Колубузда эң кичүү уулубуз бар. Анын 4 баласы бар. Кайын атам менен кайын энем аябай эмгекчил киши болчу. Көк-Ойдогу бакчаны иштеттик. Мен өзүм Чүйдүн кызы болгондуктан гүлдөткүм келди окшойт», - деди Абдылдаева.
Каарманыбыздын замандашы Жолдошбек Сооронбаев: «Шейшенбек Токтоналиев экөөбүз 76 жылдай чогуу иштедик. Үй-бүлөсү менен катышып, бала-чакасы менен аралашып, жакшы тааныйм. Шекиндин бир жакшы касиети — кандай иш болбосун тынымы жок. Абдан жоопкерчиликтүү. Сыйлык алышы менен куттуктайм», - деди.
Жумгал районунда жалпы 5 жаран жогорку мамлекеттик сыйлыктарга ээ болушту.